Runapa yapata wageni kidogo

 Wageni wakipata chakula ndani ya hifadhi ya Taifa ya Serengeti

Na Hakimu Mwafongo, Mwananchi

Posted  Jumanne,Juni10  2014  saa 24:0 AM

Kwa ufupi

Licha ya kuwa na mikakati mingi, idadi ya watalii wamekuwa ni wachache

Iringa. Licha ya Shirika la Hifadhi za Taifa (Tanapa) na wadau wengine kutumia fedha nyingi kuimarisha miundombinu na kuboresha huduma kwenye Hifadhi ya Taifa ya Ruaha (Runapa), bado inapokea wageni wachache.

Akigungumza na waandishi wa habari katika ofisi za hifadhi hiyo, ofisa mwandamizi wa utalii wa hifadhi hiyo, Eva Pwele alisema licha ya mikakati mbalimbali inayofanywa, watalii wanaoongezeka ni wastani wa asilimia 0.2 tu kwa mwaka, kiasi ambacho ni kidogo mno.

Alisema idadi ya watalii wa nje imeongezeka kutoka 19,081 mwaka 2008/9 hadi 24,293 huku wa ndani wakiwa wameongezeka kutoka 8,151 hadi kufikia 9,994 mwaka 2013.

Alisema idadi ya wageni wa ndani imekuwa ikiongezeka kidogo wakati kwa wageni kutoka nje inaongezeka kwa kiwango cha juu kidogo.

Hifadhi hiyo inafikika wakati wote, barabara za ndani ya hifadhi zimetengenezwa na kuwawezesha watalii kutembea hata wakati wa masika na kiangazi.

Kuna huduma ya malazi na mawasiliano yameimairishwa ili kuhakikisha wageni wanapata fursa nzuri ya kutembelea hifadhi hiyo. Hata hivyo tatizo ni namna watalii wanavyopatikana kwa kiasi kidogo.

Mpango wa hifadhi hiyo ni kufungua njia nyingine za barabara ili kuunganisha na Mkoa wa Mbeya kupitia wilaya ya Chunya ili wageni wanaotumia uwanja wa kimataifa wa Songwe wasitembee umbali mrefu kupitia Iringa; badala yake wawe wanapitia Wilaya ya Chunya na kuingia Ruaha.