WANASHERIA WA LHRC WAANZA KUTOA MSAADA WA KISHERIA BURE SERENGETI,

Wanasheria na wasaidizi wa sheria na haki za Binadamu wakiwa kazini

Juni 30,2014.

Kituo cha Sheria na Haki za Binadamu(LHRC)kupitia mawakili na wanasheria wake kwa kushirikiana na Wasaidizi wa Kisheria na Haki za Binadamu wilayani Serengeti Mkoa wa Mara wameanza wiki ya Msaada wa Kisheria bure kwa wakazi wa wilaya hiyo.

Mwanasheria kutoka (LHRC )Rodrick Maro akiongea naWaandishi wa habari mjini  Mugumu alisema  lengo ni kutoa msaada wa Kisheria bure kwa jamii kuhusiana na masuala ya Kisheria,ushauri na kuwajengea uwezo Wasaidizi wa Kisheria na Haki za Binadamu kuendelea kusaidia wananchi wasio na uwezo wa kupata mawakili.

Alisema kuwa wilaya hiyo ni miongoni mwa wilaya ambazo zimekuwa zikinufaika na huduma hiyo kutokana na kuwepo kwa wasaidizi wa Kisheria na Haki za Binadamu ,hivyo wanakuwepo kwa wiki nzima wakitoa huduma hiyo bure.

“Kuna matatizo mengi ya kisheria kwa wananchi hasa migogoro ya ardhi,ndoa ,mirathi,ukatili wa kijinsia  na inapotokea watu wanakosa haki zao huchukua uamzi usiostahili ….hivyo tunaona kuna  hitaji kubwa la msaada wa kisheria kwa jamii,”alisema

Mwenyekiti wa shirika la Wasaidizi wa Kisheria na Haki za Binadamu wilayani Serengeti(WASHEHABISE)Samwel Mewama amesema huduma hiyo ambayo imekuwa ikitolewa kila mwaka imesaidia wananchi wengi kujua haki zao na kuzidai,njia ambayo inaimarisha msingi wa utawala bora.

Aidha Mewama amesema kuwa mwaka jana migogoro mingi ilihusu mirathi,ukatili wa kijinsia,migogoro ya ardhi na ndoa ilipata ufumbuzi na kuomba viongozi wahamasishe wananchi kujitokeza ili kupata ushauri utakao saidia kutatua migogoro ambayo mingine inachangiwa na watendaji wa serikali wasiojua hitaji la sheria.

Baadhi ya wakazi wa mji wa Mugumu wamesema utaratibu huo ni mzuri na unawasaidia kwa kuwa watu wengi wanakosa haki zao kwa kutokujua sheria na hawana uwezo wa kulipia mawakili ili kuwawakilisha.

Jumla ya wilaya 28 zilizo na Wasaidizi wa Kisheria na Haki za Binadamu hapa nchini zinatarajiwa kufikiwa na huduma hiyo.

Mwisho.