jela miaka 70 kwa meno ya tembo

Walter Mguluchuma | Katavi

 

MAHAKAMA ya Hakimu Mkazi ya Wilaya ya Mpanda, mkoani Katavi imewahukumu watu watatu kutumikia kifungo cha  miaka 70 jela baada ya kupatikana na hatia ya kukamatwa na meno manne ya tembo yenye thamani ya sh milioni 45.

Hukumu hiyo ilitolewa jana na Hakimu Mkazi Mfawidhi, Chiganga Ntengwa, baada ya kuridhika na ushahidi uliotolewa mahakamani hapo na upande wa mashtaka.

Waliohukumiwa kifungo hicho ni Gwabi Mayala (39)  mkazi wa kijiji cha Majimoto, wilaya ya Mlele, ambaye amehukumiwa kifungo cha miaka 30  jela na kulipa fidia ya sh milioni 45; na Mashaka Mabanga (33),  mkazi wa Sumbawanga, mkoani Rukwa na Adam Kalinzi (30), mkazi wa kijiji cha Majimoto, wamehukumiwa kila mmoja kifungo cha miaka 20 jela.

Kabla ya hukumu hiyo, washtakiwa Mashaka na Adam walikiri kukamatwa na meno hayo ya tembo, lakini walidai meno hayo ni ya Mayala ambaye alikuwa amewaomba wamtafutie wateja.

Kwa upande wake, mshtakiwa Mayala aliiomba mahakama isikubaliane na maelezo ya washtakiwa wenzake kwa kuwa hayana ukweli.

Awali katika kesi hiyo, Mwanasheria wa Serikali, Fadhili Mwandoloma,  alidai washtakiwa hao walitenda kosa hilo Oktoba 10  mwaka huu, saa 4:00 usiku katika kijiji cha Majimoto, wilayani Mlele.

Alidai siku ya tukio washtakiwa walikamatwa wakiwa na meno manne ya tembo yenye uzito wa kilo 16 wakiwa katika harakati ya kuyauza.