KEBWE ATETEA WALIOGUSWA NA UJANGILI SERENGETI

chanzo-TanzaniaDaima

MBUNGE wa Serengeti, Dk. Kebwe Stephen Kebwe, amesema msako wa majangili unaofanywa na vikosi mbali mbali vya ulinzi katika hifadhi ya Serengeti, unaendeshwa kiholela hata kufikia kukamatwa watu wasiohusika na kadhia hiyo. Alisema askari walio katika operesheni hiyo wanaacha kufanya kazi kitaalamu na badala yake wanaishia kufanya kazi kwa hisia na kuelezea hali hiyo imesababisha wilaya ya Serengeti kubaki bila ya askari wa wanyama pori. Dk. Kebwe alitoa kauli hiyo jijini Dar es Salaam, jana wakati akizungumza na waandishi wa habari kutokana na kukamatwa kwa wafanyakazi wawili wa Idara ya Wanyamapori katika Halmashauri ya Serengeti wakidaiwa  kukutwa na nyara za serikali katika ofisi za serikali. Aliwataja wafanyakazi waliokamatwa kuwa ni Wilbard Boma na Omari Hussein ambao ni waajiriwa wa halmashauri ya Wilaya ya Serengeti katika idara ya wanyamapori. Alisema wafanyakazi hao kabla ya kukamtwa walikuwa wameshakamata nyara mbali mbali za serikali na kuzihifadhi katika ofisi zao kutokana na wilaya ya Serengeti kutokuwa na sehemu ya kuhifadhia nyara zinazokamatwa au kutelekezwa na majangili. “Wamewakamata hawa waliokuwa wakitusaidia kwa kazi za kuwadhibiti wanyama pori wale wasumbufu, wamefanya hivi kwa hisia tu, hivi kweli mtu mwenye dhamira ya uhalifu anaweza kuweka nyara za serikali katika ofisi anazotumia tena wazi wazi?” alihoji Dk. Kebwe. Alisema ni wakati wa serikali kuhakikisha wilaya ya Serengeti inakuwa na wafanyakazi wengine wa wanyama pori wakati wakishughulikia tuhuma dhidi ya maofisa waliokamatwa ili kuepusha mali na maisha ya wakazi wa wilaya hiyo dhidi ya wanyama wakali. Aliongeza kuwa baada ya kukamatwa kwa wafanyakazi hao na kupelekwa katika vituo vya polisi Bunda badala ya Serengeti athari zake zimeshaanza kuonekana baada ya tembo kuuwa ng’ombe wawili huku waliosalia wakiogopa kuwadhibiti kwa hofu ya kuambiwa wanawawinda wanyama hao kwa ajili ya biashara. Kaimu Mwenyekiti wa Halmashauri ya Wilaya ya Serengeti, Jumanne Kwila, akiongea kwa njia ya simu na Tanzania Daima  alisema  wafanyakazi hao walikutwa na meno ya tembo 10, vipande vya meno hivyo 13 na meno matatu ya kiboko yakiwa ndani ya ofisi za serikali zinazotumiwa na waajiriwa hao wa halmashauri.