JK,TAJA MAJANGILI-MSIGWA

M           Msigwa amtaka JK awataje majangili                             ,       I           Na Denis Mlowe,Iringa-Tanzania daima       MBUNGE wa Iringa Mjini na Waziri Kivuli wa Maliasili na Utalii Mchungaji Peter Msigwa (CHADEMA), amemtaka Rais Jakaya Kikwete awataje wahusika wa vitendo vya ujangili. Msigwa alisema Tanzania ni moja ya nchi nane duniani ambazo ziko katika kiwango cha juu sana katika biashara haramu ya ujangili na kati ya kilo 800 zinazokamatwa duniani, asilimia 37 ya meno ya tembo yanatoka Tanzania. Msingwa alitoa kauli hiyo hivi karibuni mjini hapa wakati wa maandamano ya Siku ya Ujangili yaliyodhaminiwa na Shirika la Wildlife Connection na kufanyika katika viwanja vya Mwembetogwa mjini hapa. Alisema Rais Kikwete anawajua baadhi ya vinara wa ujangili, hivyo alimtaka awataje na kuwachukulia hatua ili kukomesha vitendo hivyo. “Namshinikiza rais awataje majangili wote lakini nashangaa hakuna kauli hata moja ya kuwataja na majangili hao wanaendelea kuwateketeza tembo kila mwaka,” alisema Msigwa. Alisema suala la biashara haramu ya wanyamapori nchini limeendelea kukua kwa kasi ya ajabu huku serikali ikionesha wazi kushindwa kudhibiti suala hili, hivyo kutoa mwanya kwa majangili kuendelea kuteketeza wanyamapori. Aidha, Msigwa alisema jambo moja la msingi, wananchi wote tuungane katika kupambana na majangili walioko katika maeneo yetu na kuwafichua bila kuogopa kwa lengo la kuwanusuru tembo ambao wanateketea kila siku duniani, hasa katika mbuga za taifa hili.