JELA MIAKA 21 KWA UHUJUMU UCHUMI

 WAHUKUMIWA MIAKA 21 JELA KWA MAKOSA YA UHUJUMU UCHUMI

Oktoba 13,2013

Tarime:WATU wawili wamehukumiwa kwenda jela miaka 21 na mahakama ya hakimu Mkazi Mfawidhi wilaya ya Tarime baada ya kupatikana na makosa ya uhujumu Uchumi.

Waliohukumiwa kutumimikia adhabu hiyo ni Paulo Pancho Wairanga(31)mkazi wa Gibaso wilayani Tarime aliyekuwa anakabiliwa na kesi ya uhujumu uchumi namba 13/2013 na Marwa Mwita Mange(43) mkazi wa Masanga wilayani humo,ambaye alikuwa anakabiliwa na kesi ya uhujumu uchumi namba 36/2013.

Akitoa hukumu hiyo Hakimu wa Mahakama hiyo Adriano Kirimi alisema mahakama imeridhika na ushahidi uliotolewa mahakamani hapo haukuacha shaka yoyote dhidi ya washitakiwa kutokana na makosa yaliyokuwa yanawakabili.

Katika hukumu hizo Marwa Mwita Mange amehukumiwa kwenda jela miaka 20  bila faini baada ya kukiri makosa yote matatu yaliyokuwa yanamkabili,ikiwemo kosa la  kuingia ndani ya hifadhi bila kibali ambalo alihukumiwa faini ya sh,5,000 au kifungo cha miezi sita,na kosa la kukutwa na silaha hifadhini alihukumiwa kwenda jela miezi 12 bila faini.

Katika kosa la tatu la kumiliki nyara za serikali ambapo mshitakiwa alikutwa na  mzoga wa nyumbu ikiwa na thamani ya sh.mil.1.2  kinyume na namba 86(1)(c) ya sheria ya wanyamapori sura ya 5 ya 2009 inayosomeka na aya ya 14(b) ya jedwali la kwanza sura ya 57(1)60(2) ya sheria ya uhujumu uchumi sura namba 200 ya mwaka 2002 mshitakiwa alihukumiwa kifungo cha miaka 20,na adhabu inakwenda pamoja hivyo atatumikia miaka 20 jela.

Kwa upande wa hukumu ya Wairanga alihukumiwa kwenda jela mwaka 1 baada ya kupatikana na hatia kwa makosa mawili ya kuingia hifadhini bila kibali na kumiliki silaha ndani ya hifadhi bila kibali.

Mapema mwendesha mashitaka wa Tanapa Shukrani Fadhili Msuya akisoma maelezo aliiambia Mahakama kuwa Paulo Pancho Wairanga alikamatwa machi 22,mwaka huu katika eneo la Gong’ora ndani ya hifadhi ya Taifa ya Serengeti akikabiliwa na makosa mawili.

Mwendesha mashitaka huyo alisema katika kesi ya uhujumu uchumi namba 36/2013 ilikuwa inawakabili washitakiwa wawili ambapo Marw Mwita Mange akikiri kosa na kuhukumiwa ,mshitakiwa namba moja katika kesi hiyo Chacha Nyagana Sira(47)alikana shitaka na yuko nje kwa dhamana hadi novemba 12,2013 kesi hiyo itakaposikilizwa.

Mwisho.