Kagasheki akumbushwa kutekeleza ahadi

16/12/2013 | Posted by Dixon Busagaga | Kilimanjaro

  Waziri wa Maliasili na Utalii Balozi Khamisi Kgasheki-Picha na Journo Tourism

SERIKALI imekumbushwa kutekeleza ahadi yake ya kuwadhamini watu 100 wakiwamo askari wa Jeshi la Wananchi wa Tanzania (JWTZ), kupanda Mlima Kilimanjaro kama sehemu ya maadhimisho ya sherehe za miaka 52 ya Uhuru wa Tanganyika.

Ahadi hiyo ilitolewa mwaka jana na Waziri wa Maliasili na Utalii, Hamis Kagasheki, katika maadhimisho ya miaka 51 ya Uhuru wa Tanganyika ambapo pia alipokea timu ya watu 32 waliokuwa wamepanda mlima huo wakiwemo wabunge walio kwenye Kamati ya Ardhi, Maliasili na Mazingira.

Akikumbushia ahadi hiyo, Meja Jenerali Mstaafu, Christopher Gimonge, alielezea kutopendezwa na utekelezaji wa ahadi hiyo ambapo kwa mwaka huu vijana watano pekee kutoka JWTZ ndio walioshiriki zoezi la kupanda Mlima Kilimanjaro linalofahamika kama Uhuru Expedition.

Naye aliyekuwa Mkuu wa Jeshi la Wananchi wa Tanzania (JWTZ), Jenerali Mstaafu George Waitara, aliishauri serikali kuunda vitengo maalumu katika wizara mbalimbali kwa ajili ya ufuatiliaji wa ahadi za mawaziri, ili kulinda heshima ya serikali mbele ya jamii.

Waitara ambaye ndiye kiongozi na msimamizi mkuu wa zoezi hilo kila mwaka ameihakikishia Bodi ya Utalii Tanzania (TTB) kuwa jeshi hilo litaendelea kuunga mkono juhudi za TTB katika kuvitangaza vivuto vya utalii vya Tanzania ukiwemo Mlima Kilimanjaro.

“Licha ya changamoto zinazojitokeza bado jeshi la wananchi litaendelea kushiriki katika kutangaza vivutio vya utalii hasa Mlima Kilimanjaro kupitia msafara wetu kwa kuupanda mlima huo kila mwaka maarufu kama Uhuru Expedition ikiwa ni sehemu ya kuadhimisha Uhuru wa
Tanzania,” alisema Waitara.

Mkuu huyo wa jeshi la ulinzi mstaafu aliishukuru pia hifadhi ya taifa ya Mlima Kilimanjaro (Kinapa) kwa msaada ambao imekuwa ikitoa kwa msafara huo na kuwezesha wapandaji kutimiza azma yao ya kuutangaza mlima huo mrefu kuliko yote barani Afrika.

Mwenyekiti wa Bodi ya Wakurugenzi ya TTB, Balozi Charles Sanga, aliyeshiriki kupanda mlima huo mwaka huu alisema Bodi ya Utalii inayo furaha kuona Uhuru Expedition iliyoasisiwa na Jeshi la Wananchi wa Tanzania inaendelea kuimarika na kutekeleza malengo ya kuanzishwa kwake.