NGORONGORO TUNZENI MAZINGIRA

Ngorongoro washauriwa kutunza mazingira

Na Mussa Juma

Posted  Oktoba5  2013 

Kwa ufupi

Akizungumza katika hafla ya kukabidhi msitu wa Enguserosambu ili utunzwe na jamii, badala ya kuwa chini ya Serikali Kuu leo,  mkuu huyo wa wilaya alisema ili mazingira yaendelee kutunzwa katika wilaya hiyo ni vyema upanuzi wa mashamba ukasitishwa.

Loliondo. Mkuu wa Wilaya ya Ngorongoro, mkoani Arusha, Elias Wawa Lali, amewataka wakazi wa wilaya hiyo, kusitisha upanuzi wa mashamba ili kuzuia uharibifu wa mazingira na vyanzo vya maji.

Akizungumza katika hafla ya kukabidhi msitu wa Enguserosambu ili utunzwe na jamii, badala ya kuwa chini ya Serikali Kuu leo,  mkuu huyo wa wilaya alisema ili mazingira yaendelee kutunzwa katika wilaya hiyo ni vyema upanuzi wa mashamba ukasitishwa.

"Wakazi wa Ngorongoro wengi ni wafugaji hivyo,  ni vyema kuendelea kuboresha mifugo na kuivuna badala ya kuanzisha mashamba makubwa," alisema Lali.

Aliwataka wakazi wa Kata ya Enguserosambu kupitia bodi mpya ya kusimamia msitu huo, kuendelea kuutunza sambamba na vyanzo vya maji ili uweze kudumu.

Msitu wa Enguserosambu wenye ukubwa wa zaidi ya hekta 71,  kuanzia sasa utakuwa unasimamiwa na jamii kwa uratibu wa shirika lisilo la kiserikali la PALISEP ambalo limeahidi kushirikiana na jamii kulinda na kutunza msitu huo.

Awali Ofisa Nyuki Mkuu wa Serikali, Paulin Mafuru aliyezungumza katika hafla hiyo kwa niaba ya Katibu Mkuu wa Wizara ya Maliasili na Utalii, Maimuna Tarish alipongeza wakazi wa kata hiyo kwa kutunza msitu huo wa asili.