Kamati yampa Waziri Nyalandu muda zaidi

Waziri wa Maliasili na Utalii, Lazaro Nyalandu 

Na Goodluck Eliona

Posted  Jumatano,Mei6  2015  saa 10:40 AM

Kwa ufupi

Juzi, Waziri Nyalandu na watendaji wake waliwasilisha bajeti ya wizara kwa kamati hiyo, lakini baada ya wajumbe kuipitia walibaini kuwa haikufanyiwa marekebisho kadhaa, yakiwamo mabadiliko ya tozo za ada ya kuingia kwenye hifadhi za Taifa kama walivyokuwa wamependekeza awali.

Dar es Salaam. Kamati ya Kudumu ya Bunge ya Maliasili na Mazingira imemwongezea muda Waziri wa Maliasili na Utalii, Lazaro Nyalandu kuifanyia marekebisho bajeti ya wizara hiyo kwa mwaka 2015/2016 iliyokataliwa baada ya kubainika kuwa na kasoro kadhaa.

Juzi, Waziri Nyalandu na watendaji wake waliwasilisha bajeti ya wizara kwa kamati hiyo, lakini baada ya wajumbe kuipitia walibaini kuwa haikufanyiwa marekebisho kadhaa, yakiwamo mabadiliko ya tozo za ada ya kuingia kwenye hifadhi za Taifa kama walivyokuwa wamependekeza awali.

Waziri Nyalandu alipewa siku moja kufanya marekebisho na kisha kuiwasilisha upya bajeti hiyo jana. Hata hivyo, akizungumza mbele ya kamati jana, Nyalandu alisema muda aliokuwa amepewa haukutosha ndipo Lembeli alipoongeza muda hadi Mei 14 mwaka huu.

“Tunawapa muda hadi Mei 14, Kamati itakutana na nyinyi kule Dodoma mje mkiwa mmefanya marekebisho,” alisema Lembeli.

Lembeli alisema kamati yake haitapitisha bajeti hiyo hadi itakapojiridhisha kuwa mapendekezo yote yaliyotolewa yamefanyiwa kazi. Alitaja mapendekezo hayo kuwa ni pamoja na Nyalandu kukaidi amri ya Mahakama Kuu ya Arusha iliyotaka kuanza mara moja kwa utekelezwaji wa tozo mpya za kuingia kwenye hifadhi za Taifa.

Pia, Lembeli alisema waziri huyo alishauriwa asibadilishe mipaka ya Hifadhi ya Taifa ya Saadan kutokana na mgogoro uliokuwapo, badala yake alikata kipande cha ardhi na kukigawa kwa mwekezaji kinyume cha sheria.

Lembeli ambaye pia ni Mbunge wa Kahama, aliongeza kuwa Nyalandu amebadilisha tozo za ada kwa watalii wanaoingia kwenye hifadhi na kuwaruhusu wanaotoka nje ya hifadhi kurejea bila kulipa ada upya. Katika maagizo ya awali, mtalii anayetoka ndani ya hifadhi alitakiwa kulipa ada kila anapoingia tena.

Kwa mujibu wa kamati hiyo, ada nyingine zilizofutwa ni zilizokuwa zinatozwa katika kambi za wageni na wafanyakazi. Alipoulizwa kuhusu ada hizo, Nyalandu alisema angepandisha ada hizo Julai mwaka huu, jambo ambalo lilipingwa na wajumbe wa kamati.

Hata hivyo, Lembeli alisema kuwa viwango hivyo vilitakiwa kupandishwa tangu Aprili Mosi mwaka huu na kwamba tangu wakati huo Waziri Nyalandu ameiingizia Serikali hasara ya Sh15 bilioni