Uvunaji maliasili za Taifa lazima unufaishe Watanzania – Sumaye

08/12/2013 | Posted by Mwandishi Wetu-Tanzania daima.

WAZIRI Mkuu mstaafu, Frederick Sumaye, amesema Waafrika wakiwamo Watanzania wanapaswa kujiandaa kunufaika na uvunaji mpya unaofanyika katika rasilimali zake.

Akizungumza wakati wa ufunguzi wa mkutano wa biashara na vitega uchumi unaohusisha Tanzania na Uingereza jana jijini London, alisema maliasili za Afrika bado hazijasaidia sana maendeleo ya Waafrika kama ilivyo kwa mataifa mengine.

“Kutokana na maendeleo ya biashara, maliasili nyingi zimekuwa  zikutumika sehemu mbalimbali duniani…ukilinganisha na bara la Afrika ambalo halina maendeleo makubwa, maliasili nyingi zinahitajika kutumika kutokana na uwepo wake kwa wingi,” alisema Sumaye.

Katika hotuba yake iliyopatikana jijini Dar es Salaam jana, Sumaye alisema kuwepo kwa maliasili hizo kunatoa mvuto kwa wengi kuliangalia kwa macho mawili bara la Afrika, hivyo kuwafanya wengi kujitokeza kuziwania huku wenyeji wakijiuliza kuhusu ni kwa namna gani watanufaika nazo.

Sumaye ambaye amechukua nafasi ya Waziri Mkuu, Mizengo Pinda aliyeahirisha kushiriki mkutano huo, alisema uvamizi unaofanyika sasa ni kama mwingine wowote uliofanyika katika nyakati zilizopita.

Aliongeza kuwa uvamizi wa sasa una sura tofauti, lakini swali la kujiuliza ni kuhusu nani anayehofia uvamizi huo, kama ni raia wa kigeni au mwenyeji.

“Kwa mimi uvamizi wa wawekezaji kama vile Wachina katika rasilimali zilizopo ni jambo zuri na hasa kama Waafrika watanufaika na wataongoza mchakato wa matumizi ya rasilimali hizo,” alisema.

Alifafanua kuwa ujio wa wavamizi hao ni jambo zuri kwa kuwa wanafanya kwa ushindani, hivyo kutoa nafasi nyingi za kupata mikataba minono, kutegemea na jinsi watakavyokuwa wamechanga karata zao vizuri.

Sumaye alisema jambo la msingi ni kuhakikisha wazalendo wanashirikishwa kwa wingi kadiri iwezekanavyo, na hasa katika kupata fursa za ajira, teknolojia, ushuru na ongezeko la thamani za rasilimali zao.

Mkutano huo ulimhusisha Balozi wa Tanzania nchini Uingereza, Peter Kalaghe, maofisa ubalozi, Watanzania waishio nje ya nchi na wageni wengine.

Hata hivyo, Sumaye alionya kuwa jitihada za kuvutia wawekezaji haziwezi kufanikiwa kama viongozi wake na serikali hazitakuwa makini katika vita dhidi ya vitendo vya rushwa.

“Rushwa katika mazingira yoyote, iwe kwa mwekezaji au serikali, haipaswi kuachiwa iendelee kuwepo,” alisema Sumaye na kuongeza kuwa zipo baadhi ya sekta ambazo zinaendelea kwa kasi kubwa kama ile ya utalii.