WAHUKUMIWA KIFUNGO KWA KUINGIA H.IFADHINI BILA KIBALI

   Oktoba 28,2013.

Serengeti:

WAKAZI wanne kutoka wilaya ya Ngorongoro mkoani Arusha wamehukumiwa na mahakama ya  wilaya ya Serengeti  kifungo cha miezi sita jela ama kulipa faini ya sh,120,000 kila mmoja  kwa kosa la  kuingia hifadhi ya taifa ya Serengeti bila kibali.

Waliohukumiwa na mahakama hiyo ni  Ndotei Sundi(30)Siatoi Warukwar(19) Kitupe Lesiani (30)wakazi wa kijiji cha Warbai na Daud Kesoi(19)mkazi wa kijiji cha Maranja  Ngorongoro ambao walikosa fedha na kuamriwa kwenda gerezani.

 walitenda kosa hilo oktoba 23 mwaka huu majira ya saa 8:00 mchana.

Mbele ya hakimu mkazi wa mahakama hiyo  Franco Kiswaga , Mwendesha mashitaka  wa polisi sajenti Paskael Nkenyenge  alidai oktoba 23 mwaka huu majira ya saa  8:00 mchana  askari wa hifadhi hiyo wakiwa doria eneo la Naabi waliwakamata washitakiwa hao na hawakuwa na kibali cha kuingia hifadhini.

Washitakiwa wote walikiri shitaka la kuingia hifadhini bila kibali na kuilazimu mahakama hiyo kutoa adhabu kulingana na kosa walilotenda.

Akitoa hukumu Hakimu Kiswaga ameiambia mahakama kuwa kufuatia washitakiwa kukiri shitaka bila kuisumbua mahakama ,anawahukumu kila  mmoja  kulipa faini ya shilingi 120,000  ama kutumikia kifungo cha miezi sita jela ili iwe onyo kwa wenye tabia kama hiyo .

Mwisho.