MAJANGILI WAUAWE

Kagasheki: Majangili wauawe

WAZIRI wa Maliasili na Utalii, Balozi Khamis Kagasheki, amewataka askari wa wanyama pori kuhakikisha wanamalizana  na majangili wa tembo pindi wanapokutana nao porini na kwenye hifadhi za taifa. Aidha waziri huyo alisema kwenye kikao kijacho cha Bunge, watapeleka mabadiliko ya sheria yatakayotoa meno zaidi kwa vyombo vya sheria kukabiliana na wimbi la ujangili na kuongeza adhabu kwa watakaobainika au kukutwa na nyara za taifa. Kagasheki alitoa kauli hiyo jana jijini hapa mara baada ya kuongoza  matembezi ya kupiga vita ujangili wa tembo ambayo yameandaliwa na Taasisi ya David Sheldrick Wildlife Trust kupitia kampeni ya meno ya tembo. Matembezi hayo yaliwashirikisha wadau mbalimbali wa utalii akiwemo, Patrick Patel kutoka Kampuni ya African Wildlife Trust aliyetembea kwa miguu kutoka Arusha hadi Dar es Salaam akipinga ujangili wa tembo. Kagasheki alisema kuwa kuna majangili na kwa sasa sheria dhaifu zimechangia kwani mtu anakamatwa akiwa na nyara za taifa halafu anaishia kupigwa faini ya fedha kidogo. Alisema kuwa wanapeleka mabadiliko bungeni ili kuwezesha wale wanaopatikana na hatia wapatiwe adhabu kubwa itakayowafanya wengine kuogopa kufanya ujangili na kuacha biashara hiyo. “Wana usalama wakikutana na majangili huko kwenye porini wawamalize huko huko, tena katika jambo hili nawaomba wale watetezi wa haki za binadamu wafunge midomo. “Hata hao majangili wakiwakuta watawamaliza pamoja na tembo,” alisema Kagasheki huku umati wa watu uliokusanyika ukipiga makofi kushangilia. Allisema kuwa kazi ya serikali ni kuwatetea wale wasio na uwezo wa kujitetea wenyewe kama wanyama wa porini akiwemo tembo na kwa kuwa kumekuwa na tatizo la kesi kuchukua muda mrefu, suluhisho ni vyombo vya ulinzi  kumalizana na majangili huko huko pindi wakiwakamata. Waziri huyo aliongeza kuwa Tanzania imechafuka kimataifa kutokana na matukio ya mauaji ya tembo licha ya kuongoza kwa kuwa na idadi kubwa ya tembo ikifuatiwa na Botswana. Pia alikemea tabia iliyoibuka ya baadhi ya wanasiasa kutafuta ubunge na urais kwa kutumia hifadhi jambo aliloonya kuwa likiachwa hivyo hivyo litasababisha kuharibu uhifadhi wa wanyamapori hapa nchini. Naye Patrick Patel alisema kuwa matembezi ya awali aliyoyafanya kutoka Arusha hadi Dar es Salaam yameleta hamasa  kubwa kwa wananchi na ndio maana nchi 15 duniani zimeshiriki katika matembezi ya kitaifa dhidi ya ujangili wa tembo. Alitaja miji mingine iliyoshiriki matembezi hayo kuwa ni Bangkok (Thailand), Buenos Aires (Argentina), Cape Town (Afrika Kusini), Edinburg (Scotland), London (Uingereza), Melbourne (Australia) na Munich (Ujerumani). Zingine ni Nairobi (Kenya), Roma (Italia), Toronto (Canada), New York City, Washington DC na Wellington (Marekani). Matembezi hayo yalianzia eneo la Majengo hadi viwanja vya AICC Kijenge na kushirikisha wanafunzi wa shule za msingi na sekondari pamoja na wadau wa utalii. Mwenyekiti wa Chama cha Mawakala wa Utalii Nchini (Tato), William Chambulo, aliiomba serikali kubadili sheria ya wanyamapori ya uwindaji wa kitalii ili kuzuia uwindaji wa tembo.